Faraların düzgün nizamlanma qaydası
Bir çox sürücünün farası nizamsız olduğu üçün işığı əyri vurur. Misal üçün avtomobil var ki, faraları biri aşağı, digəri yuxarı vurur. Piyada vurma hallarının bir səbəbi də düz vurmayan faranın yolu yaxşı göstərə bilməməsindən yaranır.
Ustaya getmədən düzgün nizamlanmanı özünüz də edə bilərsiniz. İşə başlamazdan öncə faranın yüksəklik səviyyəsini salondan sıfır səviyyəsinə gətirin. Bu, yüksüz səviyyə deməkdir.
Daha sonra motor qapağını açırsınız. Faraların üstündə 2 ədəd plastik şrup olur. Qırmızı ox ilə şrup faranı sağa-sola tənzimləyir. Sarı ox olan şrup isə faraları aşağı-yuxarı hərəkət etdirir. Ümumi halda çox avtomobildə uzaq və yaxın vuran işıqlar birlikdə tənzimlənir. Loru dildə desək, yaxın və uzaq vuran işıqları ayrı-ayrılıqda tənzimləmək olmur. İstisna olaraq, Lada 2106 modelini göstərə bilərik.
Daha sonra avtomobili düz divardan 10 metr geridə saxlayırıq. Bunu havanın qaranlıq vaxtında etmək daha məqsədəuyğundur. Faranız yerdən 80 sm hündürlükdədirsə, 10 metr irəlidə faranızın vuracağı işığın yerdən hündürlüyü 70 sm olmalıdır.
Faranın vurduğu 45 dərəcəlik bucaq işığı sizi yanıltmasın. Bu işıq yol kənarında olan xəbərdarlıq nişanlarının işıqlandırılaraq daha yaxşı görülməsi üçündür. Onun güclülük dərəcəsi faranın performansı ilə əlaqəlidir. Bunları etdikdən sonra faralarınız yolu daha düzgün işıqlandıracaq.
