Hansı ehtiyat hissələr mütləq orijinal olmalıdır?

Orijinal ehtiyat hissələrinin avtomobil üçün niyə bu qədər vacib olduğu çox zaman istifadəçilərin diqqətindən yayınır. Lakin avtomobilin təhlükəsizliyi, davamlılığı və ümumi iş prinsipi birbaşa istifadə olunan detalların keyfiyyətindən asılıdır. Orijinal ehtiyat hissələri istehsalçı tərəfindən xüsusi sınaqlardan keçirilir, yüksək texniki göstəricilərlə hazırlanır. Avtomobilin konstruksiyasına tam uyğun olacağına zəmanət verir. Bu komponentlər həm mühərrik, həm də elektron sistemlərlə sinxron işləyir, yol hərəkəti zamanı qəza riskini minimuma endirir. Orijinal olmayan, saxta və ya keyfiyyətsiz alternativlər isə ilk baxışda cəlbedici olsa da, avtomobilin resursunu azaldır, idarəetmədə problemlər yaradır. Qısası təhlükəsizlik sistemlərinin düzgün işləməsinə mane olur. Avtomobil sahibləri hansı hissələrin mütləq orijinal seçilməli olduğunu bilməli və yalnız etibarlı mənbələrdən hissə əldə etməlidirlər.
Bu məqalədə oxucular avtomobilin təhlükəsizliyi və uzunömürlülüyü üçün hansı ehtiyat hissələrin mütləq orijinal seçilməli olduğunu və saxta alternativlərin hansı risklər yaratdığını öyrənəcəklər.

Orijinal ehtiyat hissələrin əhəmiyyəti

Orijinal ehtiyat hissələr avtomobil istehsalçısının standartlarına uyğun hazırlanmış və xüsusi sınaqlardan keçmiş detallar olduğuna görə həm təhlükəsizlik, həm də uzunömürlülük baxımından böyük rol oynayır. Bu detallar avtomobilin konstruktorlar tərəfindən müəyyən edilmiş texniki xüsusiyyətlərini tam daşıdığı üçün hərəkət zamanı əlavə səs-küy yaratmır. Digər komponentlərin vaxtından əvvəl sıradan çıxmasının qarşısını alır və avtomobilin ümumi performansını stabil saxlayır. Saxta və qeyri-orijinal hissələrdə isə material keyfiyyəti aşağı olur, mexaniki dayanıqlıq zəif olur. Bu da mühərrikdən tutmuş əyləc sisteminə qədər bir çox hissəni riskə atır. Belə detallar avtomobilə əlavə yük salır, yanacaq sərfiyyatını artırır, sürüş təhlükəsizliyini aşağı salır. Ən əsası, gözlənilməz nasazlıqlara gətirib çıxarır.

Orijinal hissələr avtomobilin təhlükəsizliyinə necə təsir edir?

Avtomobilin təhlükəsizlik sistemi bir-biri ilə tam uyumlu şəkildə çalışan orijinal hissələr üzərində qurulur. Buna görə də, ən kiçik komponent belə istehsalçı tərəfindən dəqiq hesablanmış texniki göstəricilərə malik olur. Bu göstəricilər pozulduqda avtomobilin idarəetmə, yol tutuşu, əyləc məsafəsi kimi kritik xüsusiyyətləri zəifləyir və sürüş zamanı risk artır. Orijinal olmayan əyləc balataları əyləc məsafəsini uzadaraq qəza ehtimalını yüksəldir. Sükan çubuqları düzgün oturmadıqda idarəetmədə gecikmə yaranır. Keyfiyyətsiz filtr sistemi isə mühərrikin içinə toz və çirk daxil edərək onun zədələnməsinə səbəb olur. Təhlükəsizlik yastıqları, ABS sensorları, hava axını və oksigen sensorları kimi elektron komponentlərin orijinal olmaması avtomobilin səhv məlumat almasına gətirib çıxarır. Bu da təhlükəsizlik sistemlərinin düzgün işləməsinə mane olur.

Saxta və ucuz alternativlərin yaratdığı risklər

Saxta və qeyri-orijinal ehtiyat hissələri xarici görünüşdə orijinala oxşasa da, keyfiyyət baxımından heç bir standart daşımır və onların istehsalında aşağı davamlılığa malik materiallardan istifadə edilir. Bu detallar mühərrikin iş ritmini pozur. Elektrik sistemində nasazlıqlar yaradır, asqı və sükan hissələrində boşluq əmələ gətirir və nəticədə avtomobilin idarə olunmasını çətinləşdirir. Ucuz alternativlər qısa müddətdə sıradan çıxdığı üçün təkrar-təkrar dəyişdirilmə tələb edir. Bu, uzun müddətdə daha çox xərc yaradır. Ən təhlükəlisi odur ki, saxta əyləc balataları, sükan detallarının zəif olması və keyfiyyətsiz amortizatorlar sürüş zamanı qəfil nasazlığa səbəb olaraq ciddi qəza riski yaradır. Orijinal olmayan hissələr avtomobilin istehsalçı zəmanətini ləğv edə bilər. Hər hansı problemlə üzləşdikdə bütün məsuliyyət sürücünün üzərinə düşür. Buna görə də saxta və keyfiyyətsiz hissələr yalnız əlavə xərc deyil, ciddi təhlükəsizlik problemi deməkdir.

Mühərrik üçün mütləq orijinal olmalı hissələr

Mühərrik avtomobilin ürəyi hesab olunur. Avtomobilin ümumi performansı, sürüş komfortu və istismar müddəti birbaşa bu hissənin sağlam işləməsindən asılıdır. Buna görə də mühərrikə aid olan bütün vacib detalların orijinal seçilməsi xüsusilə önəmlidir. Orijinal mühərrik hissələri istehsalçı tərəfindən yüksək temperatura, sürtünməyə, təzyiqə və davamlı yüklənməyə uyğun şəkildə layihələndirilir. Xüsusi materiallardan hazırlanır və sınaqlardan keçirilir. Bu detallar düzgün yağlanma, sabit sıxılma, keyfiyyətli yanma prosesi və mühərrikin daxili mexanizmlərinin bir-biri ilə zərərsiz işləməsini təmin edir. Saxta və ucuz alternativlər isə ilk dövrdə özünü büruzə verməsə də, qısa müddətdə mühərrikin içində aşınmanı artırır. Sürtünməni yüksəldir, yağ kanallarını çirkləndirir və ümumi resursu azaldır. Nəticədə avtomobil daha çox yanacaq sərf edir, mühərrik səs-küylü işləyir, soyuq və isti vəziyyətdə çətin işə düşür. Ən pisi, gözlənilmədən böyük nasazlıqlar yarana bilər. Yağ, hava, yanacaq filtrləri, zamanlama kəməri və zənciri kimi mühərrikə birbaşa təsir edən bütün əsas hissələr mütləq orijinal seçilməli, alınarkən həm brendə, həm də satıcının etibarlılığına ciddi diqqət yetirilməlidir.

Yağ filtri

Yağ filtri mühərrikdə dolaşan yağın təmiz qalmasını və bütün hərəkətli hissələrin düzgün yağlanmasını təmin edən ən vacib qoruyucu detallarından biridir. Mühərrik işlədikcə yağın içində metal yonqarları, çirk hissəcikləri, yanacağın yanmasından yaranan çöküntülər və müxtəlif mikroskopik qalıqlar toplanır. Orijinal yağ filtri bu çirkləri effektiv şəkildə süzərək onların mühərrikin içindəki porşen halqaları, krank mili, eksantrik mili, klapanlar və digər sürtünən səthlər üzərinə düşməsinin qarşısını alır. Saxta və keyfiyyətsiz yağ filtrləri isə çox zaman ya zəif filtrasiya edir, ya da ümumiyyətlə texniki tələblərə cavab vermir. Nəticədə yağ kanalları çirklənir, yağın təzyiqi aşağı düşür və mühərrikin içində sürtünmə artır. Bu zaman mühərrik hissələri daha tez yeyilir, yağ sərfi çoxalır, yağ yanması, mavi tüstü və səs-küy kimi əlamətlər meydana çıxa bilər. Uzun müddətdə isə belə filtrdən istifadə mühərrikin əsas kapital təmirinə ehtiyac yaratmağa qədər ciddi problemlərə gətirib çıxarır. Buna görə yağ filtri kimi mühərriki birbaşa qoruyan hissə mütləq orijinal seçilməlidir. Dəyişdirmə intervalı da istehsalçının tövsiyəsinə uyğun olaraq vaxtında yerinə yetirilməlidir.

Hava filtri

Hava filtri mühərrikə daxil olan havanı təmizləyən, toz, qum, his və digər zərərli hissəciklərin silindrlərə çatmasının qarşısını alan çox vacib elementdir. Mühərrikdə düzgün yanma prosesi üçün hava və yanacağın müəyyən nisbətdə qarışması tələb olunur. Bu balans pozulduqda həm güc azalır, həm də yanacaq sərfiyyatı artır. Orijinal hava filtri elə quruluşda hazırlanır ki, həm havanı maksimum dərəcədə təmizləyir, həm də mühərrikə lazım olan hava axınını məhdudlaşdırmır. Keyfiyyətsiz və saxta filtrlərdə isə filtr materialı zəif olur, hava keçid kanalları düzgün hesablanmır və nəticədə mühərrik kifayət qədər hava ala bilmir. Bu zaman elektrik qaz paylayıcı sistem daha çox yanacaq vurmağa məcbur qalır. Qarışıq zənginləşir, yanacaq sərfiyyatı artır, qaz reaksiyası zəifləyir və avtomobilin dinamikası pisləşir. Filtr materialı havanı yetərincə təmizləmədikdə silindr divarlarında, porşen halqalarında və klapanlarda aşınma sürətlənir. Uzun müddətdə bu, mühərrikin resursunu ciddi şəkildə azaldır. Ona görə də hava filtri mütləq orijinal seçilməli, xüsusilə tozlu şəhər və yol şəraitində daha tez-tez yoxlanmalı və lazım gəldikdə vaxt itirmədən dəyişdirilməlidir.

Yanacaq filtri və nasazlığın yaratdığı problemlər

Yanacaq filtri mühərrikə ötürülən yanacağın içindəki çirkləri, suyu və mikroskopik qalıqları süzərək injektorların, yanacaq nasosunun və yanma kamerasının qorunmasında əsas rol oynayan hissədir. Yanacağın keyfiyyəti hər zaman uyğun olmadığından, filtrləmə sistemi mühərrikin sağlam qalması üçün həyati əhəmiyyət daşıyır. Orijinal yanacaq filtrləri müəyyən təzyiqə və axın sürətinə uyğun hesablanır, tərkibindəki filtr materialı hissəcikləri tutmaqla yanaşı, yanacaqın axınını da məhdudlaşdırmır. Saxta və ucuz yanacaq filtrlərində isə filtrasiya səviyyəsi zəif olur. Çirk injektorlara dolaraq onların uclarını tutulmasına, püskürtmə formasının pozulmasına, nəticədə yanmanın qeyri-bərabər getməsinə səbəb olur. Bu zaman mühərrikdə titrəmə, boş sürətdə qeyri-sabitlik, güc itkisi, qazı basarkən ləngimə və hətta mühərrikin sönməsi kimi hallar ortaya çıxır. Uzun müddət belə filtrlə işləmək yanacaq nasosunun sıradan çıxmasına və mühərrikdə ciddi nasazlıqlara gətirib çıxarır. Buna görə yanacaq filtri mühərrik üçün kritik elementlərdən biridir və mütləq orijinal seçilməlidir. Xüsusən də dizel mühərriklərində vaxtında dəyişdirilməsi xüsusi diqqətdə saxlanılmalıdır.

Zamanlama kəməri və zənciri

Zamanlama kəməri və ya zənciri mühərrikin ən həssas və təhlükəli nəticələr yarada bilən hissələrindən biridir. Çünki o, krank mili ilə eksantrik milinin hərəkətini sinxronlaşdıraraq klapanların açılıb-bağlanma vaxtını tənzimləyir. Bu sinxronluq pozulduqda, yəni kəmər diş atladıqda və ya qırıldıqda porşenlər klapanlara dəyə və mühərrikin içində çox ağır mexaniki zədələnmə baş verə bilər. Orijinal zamanlama kəmərləri yüksək temperatur, yağ buxarı, mexaniki gərginlik və uzunmüddətli yüklənməni nəzərə alaraq xüsusi materiallardan hazırlanır. Dişlərin forması və elastiklik dərəcəsi istehsalçının mühərrikə görə hesablamasına tam uyğundur. Saxta və ucuz kəmərlərdə isə material keyfiyyəti aşağı olduğundan onlar tez çatlayır, dişləri yeyilir və gözlənilmədən qırıla bilər. Bu isə adi bir nasazlıq deyil, mühərrikin tam kapital təmirinə, yəni çox yüksək xərcə səbəb ola biləcək problem deməkdir. Zəncirli zamanlama sistemlərində də orijinal olmayan detalların istifadəsi səs-küy artımı, gərginlik itməsi və zəncirin sıçraması kimi risklər yaradır.

Əyləc sistemi üçün yalnız orijinal hissələrin seçilməsi

Əyləc sistemi avtomobilin ən əsas və həyati təhlükəsizlik mexanizmlərindən biridir. Sürüş zamanı qəfil maneələrdən yayınmaq, yüksək sürətdə avtomobili stabil şəkildə saxlamaq, yol şəraitinə uyğun təhlükəsiz dayanma göstərmək kimi bütün funksiyalar məhz əyləc sisteminin düzgün işləməsindən asılıdır. Bu sistemin balata, disk, kaliper, borular, ABS sensorları, hidravlik maye və digər komponentlər bir-biri ilə tam dəqiqliklə işləməlidir. Bu dəqiqlik yalnız orijinal hissələrdə olur. Keyfiyyətsiz və saxta alternativlər daha tez qızır, təzyiqə davam gətirmir, sürtünmə zamanı effektini itirir və sürücünü ən kritik anda çətin vəziyyətdə qoya bilər. Orijinal hissələr isə yüksək temperatur, yüksək sürət, sərt əyləcləmə və intensiv istifadə zamanı belə stabil performans göstərir, hərəkət zamanı boşluq və qeyri-sabitlik yaratmır. Buna görə əyləc sistemi üçün detalların orijinal seçilməsi təhlükəsizlik baxımından mütləqdir. Bu, heç vaxt kompromis ediləcək sahə olmamalıdır.

Əyləc balatası

Əyləc balatası avtomobilin əyləc prosesində ən birbaşa rol oynayan hissədir və onun keyfiyyəti birbaşa avtomobilin dayanma məsafəsinə təsir edir. Keyfiyyətsiz və saxta balatalar əyləc məsafəsini artırır, təzyiq altında tez aşınır. Yüksək temperaturda öz funksiyasını itirir və sürtünmə zamanı səs-küy yaradır. Bu tip balatalar qızdıqda effektivliyini itirdiyi üçün uzun enişlərdə, yüksək sürətli əyləcləmədə və təcili dayanma anlarında təhlükəli nəticələr yarada bilər. Orijinal balatalar isə xüsusi ərintilərdən və istiliyə davamlı materiallardan hazırlanır, temperatur dəyişikliklərinə uyğunlaşa bilir və sürtünmə səviyyəsini optimal şəkildə qoruyur. Onlar disklə tam uyğun işlədiyi üçün sürtünmə səthində bərabər aşınma yaradır, vibrasiya və səs yaratmır. Avtomobilin ən kritik təhlükəsizlik elementlərindən biri olan balata mütləq orijinal seçilməlidir. Çünki burada ucuz alternativ axtarmaq həm sürücünün, həm də sərnişinlərin təhlükəsizliyini ciddi şəkildə riskə atır.

Əyləc diskləri

Əyləc diskləri yüksək sürtünmə, yüksək temperatur və intensiv istifadə altında daim böyük yükə məruz qalan hissələrdir. Saxta və ucuz disklər isə bu şərtlərə uyğun hazırlanmadığı üçün tez qızır, səthi əyilir. Mikroçatlarla örtülür və nəticədə sürücü sükanda vibrasiya hiss etməyə başlayır. Vibrasiya sadəcə komfortsuzluq deyil, əyləcin bərabər tutulmaması deməkdir və bu vəziyyət yüksək sürətdə ciddi təhlükə yaradır. Orijinal disklər xüsusi ərintidən hazırlanır, yüksək istiliyə dözümlüdür, temperatur dəyişikliyində formasını itirmir və balata ilə uyğun şəkildə uyğun işləyir. Onlar yüksək sürətdə daha stabil əyləc performansı təmin edir. Uzun müddət aşınmadan istifadə oluna bilir. Ucuz alternativlər isə həm daha tez çatlayır, həm də təhlükəli hallara gətirib çıxarır. Bu səbəbdən əyləc diskinin orijinal seçilməsi avtomobilin təhlükəsizliyi üçün vacib şərtdir.

ABS sensoru və sistem komponentləri

ABS sistemi avtomobilin sürüş zamanı təkərlərin bloklanmasının qarşısını alır və sərt əyləcləmə zamanı idarəetmənin itirilməməsi üçün həyati əhəmiyyət daşıyır. Bu sistemin düzgün işləməsi üçün hər bir sensorun oxuması dəqiq olmalıdır. Çünki elektron idarəetmə beyni məhz bu məlumatlara əsasən təkərlərə ayrı-ayrılıqda əyləc təzyiqi tətbiq edir. Saxta ABS sensorları və ucuz elektron komponentlər çox zaman səhv oxuma verir, gecikmə yaradır və sistemin düzgün işləməməsi ilə nəticələnir. Bu isə fövqəladə vəziyyətdə təkərlərin bloklanmasına, avtomobilin sürüşməsinə və idarəetmənin itirilməsinə səbəb ola bilər. Orijinal ABS sensorları isə yüksək dəqiqliklə işləyir, avtomobilin idarəetmə beyni ilə tam uyğunluq göstərir. Təhlükəli situasiyalarda stabil davranışı təmin edir. Buna görə ABS sistemi ilə bağlı sensorlar, modul, naqillər, valf blokları yalnız orijinal seçilməli və avtomobilin təhlükəsizlik mexanizmləri heç vaxt risk altına qoyulmamalıdır.

Asqı və sükan sistemində orijinallığın vacibliyi

Asqı və sükan sistemi avtomobilin yolda necə davrandığını, manevr qabiliyyətini, yol tutuşunu və sürüş komfortunu müəyyən edən ən vacib mexanizmlərdəndir. Bu sistemlər təkərlə yol arasında birbaşa əlaqə yaradır və hər bir detaldakı ən kiçik nasazlıq belə avtomobilin idarəolunmasına təsir edir. Orijinal hissələr istehsalçı tərəfindən xüsusi sınaqlardan keçirilir, düzgün elastiklik, sərtlik və möhkəmlik balansına malik olur. Avtomobilin çəkisi, mərkəzi ağırlıq nöqtəsi və sükan mexanizmi ilə ideal uyğunluq göstərir. Saxta və keyfiyyətsiz alternativlər isə çox vaxt sükanın gec reaksiya verməsinə, avtomobilin yolda və çuxurlarda idarəetmənin itirilməsin, təhlükəli vəziyyətlərin yaranmasına səbəb olur. Bu hissələrin keyfiyyətsiz olması təkcə komfortu deyil, həm də təhlükəsizliyi ciddi şəkildə zəiflədir. Buna görə asqı və sükan sistemi ilə bağlı bütün hissələrin orijinal seçilməsi avtomobilin stabil və təhlükəsiz idarə olunması üçün məcburi şərtdir.

Amortizatorlar

Amortizatorlar avtomobilin yolda sabit qalmasını, çuxurlarda və maneələrdə idarəetmənin pozulmamasını, təkərlərin səthlə kontaktını daima qoruyaraq sürüş təhlükəsizliyini təmin edən əsas hissələrdəndir. Saxta amortizatorlar lazımi hidravlik müqaviməti göstərmədiyi üçün yol kələ-kötür olduqda avtomobil yırğalanır. Dairəvi hərəkətlərdə yana əyilmə artır, yüksək sürətdə isə avtomobilin arxa və ya ön hissəsi sabitliyini itirə bilər. Bu isə sürüş zamanı həm sürücünü yorur, həm də qəza riskini yüksəldir. Orijinal amortizatorlar isə düzgün sərtlik səviyyəsində olur. Çuxurların təsirini azaldır, kəskin döngələrdə sabitliyi qoruyur və təkərlərin yol ilə tam təmasda qalmasını təmin edir. Nəticədə avtomobil daha stabil davranır, sükan daha dəqiq reaksiya verir və sürüş daha təhlükəsiz olur. Bu səbəbdən amortizatorlar kimi kritik asqı hissələri mütləq orijinal seçilməlidir.

Rot, tiq və digər sükan hissələrinin keyfiyyəti

Rot, tiq, rot başlığı, sükan çubuqları və digər sükan hissələri avtomobilin hərəkət istiqamətini müəyyən edən və sürücünün sükan əmrlərini təkərlərə ötürən əsas komponentlərdir. Bu hissələr keyfiyyətsiz olduqda sükan boşluğu yaranır, idarəetmə gecikməyə başlayır. Avtomobil çuxurlarda öz-özünə sağa-sola çəkilir və yüksək sürətdə idarəetmə tamamilə qeyri-sabit hala gəlir. Saxta sükan hissələri həmçinin amortizatorlara və digər asqı elementlərinə əlavə yük salır. Onların vaxtından əvvəl sıradan çıxmasına səbəb olur. Orijinal hissələr isə yüksək möhkəmlikdə istehsal olunur, dəqiq ölçülərə malikdir və sükan sistemində uyğun oturmanı təmin edir. Bu hissələrin orijinal olması sayəsində sükan daha yüngül, dəqiq və təhlükəsiz işləyir, avtomobilin hərəkət xəttindən yayınma ehtimalı azalır. Yəni sükan sistemi üçün istifadə olunan bütün hissələr mütləq orijinal seçilməlidir. Çünki buradakı ən kiçik nasazlıq belə böyük təhlükələrə yol aça bilər.

Stabilizator rezinləri və detalları

Stabilizator çubuğu və onun rezinləri avtomobilin döngələrdə yan yatma dərəcəsini tənzimləyən, yolda sabitliyi qoruyan və asqı sisteminin bərabər işləməsini təmin edən vacib hissələrdir. Keyfiyyətsiz və saxta rezinlərdə material zəif olduğuna görə onlar tez sərtləşir, çatlayır və öz elastikliyini itirir. Bu zaman avtomobildə səs-küy, döngələrdə sallanma, xırda maneələrdə titrəmə və ümumi sabitlik itkisi yaranır. Belə rezinlər stabilizator çubuğunu düzgün saxlamadığı üçün çubuğun hərəkəti normadan artıq olur və təkərlərin yolda tutuşunu zəiflədir. Orijinal stabilizator rezinləri və detalları isə xüsusi elastomer materiallardan hazırlanır. Temperatur dəyişikliyinə davamlıdır və uzun müddət deformasiyaya uğramadan fəaliyyət göstərir. Bu sayədə həm komfort artır, həm də döngələrdə təhlükəsizlik səviyyəsi yüksək olur. Buna görə stabilizator rezinləri və əlaqəli hissələrin orijinal seçilməsi avtomobilin ümumi sabitliyi üçün mühüm rol oynayır.

Elektrik və elektronika hissələrində orijinal seçimin üstünlükləri

Avtomobildə elektrik və elektronika sistemi ən həssas və mürəkkəb mexanizmlərdən biridir. Mühərrik idarəetmə bloku, sensorlar, elektrik ötürmə xətləri, işə salma sistemi, yüklənmə mexanizmləri və digər elektron elementlər bir-biri ilə tam sinxron işləyir. Bu sistemdə yaranan ən kiçik nasazlıq belə avtomobilin ümumi fəaliyyətinə ciddi təsir göstərir. Orijinal olmayan elektrik hissələri avtomobilin elektrik yükünü daşımaq üçün nəzərdə tutulmur. Material keyfiyyəti zəif olur və elektron sistemlərə düzgün gərginlik və cərəyan ötürə bilmir. Bu isə bəzən mühərrikin işindən tutmuş təhlükəsizlik sistemlərinə qədər bütün mexanizmlərin sıradan çıxmasına səbəb ola bilər. Orijinal elektrik hissələri isə avtomobilin istehsalçı tələblərinə uyğun şəkildə hazırlanır. Yüklənmə zamanı stabil qalır, nasazlıq yaratmır və digər detalların işinə müdaxilə etmir. Elektronika sistemində orijinal seçimin edilməsi avtomobilin daha təhlükəsiz, uzunömürlü və problemsiz işləməsi üçün əsas şərtlərdən biridir.

Akkumulyatorun orijinal olmasının səbəbləri

Akkumulyator avtomobilin elektrik enerjisini təmin edən əsas komponentdir. Mühərrik işə düşənə qədər bütün elektrik yükünün böyük bir hissəsini daşıyır. Orijinal akkumulyator istehsalçı tərəfindən avtomobilin gərginlik, cərəyan gücü, soyuq işə düşmə dəyəri, enerji ehtiyatı və yüklənmə dövrü kimi parametrlərinə əsasən uyğunlaşdırılmış şəkildə hazırlanır. Bu, onun həm qışda, həm yayda, həm də yüksək elektrik yükü olan vəziyyətlərdə sabit performans göstərməsini təmin edir. Saxta və keyfiyyətsiz akkumulyatorlar isə gərginliyi stabil saxlaya bilmir. Tez boşalır və elektron idarəetmə bloklarına zərər verə bilər. Bu hissələrdə istifadə olunan materialların keyfiyyətinin aşağı olması onların ömrünü qısaldır, ani enerji düşüşləri yaradır. Avtomobilin mühərrikinin işə düşməsini çətinləşdirir. Orijinal akkumulyator həm daha dayanıqlıdır, həm də bütün sistemlərə sabit enerji ötürdüyü üçün elektronika sisteminin sağlam işləməsinə xidmət edir.

Generator və starter üçün riskli alternativlər

Generator və starter avtomobilin elektrik sistemində bir-birini tamamlayan və mühərrikin düzgün işləməsi üçün həyati əhəmiyyət daşıyan iki əsas komponentdir. Generator avtomobil işləyərkən bütün elektrik sistemlərini qidalandırır və akkumulyatoru doldurur. Keyfiyyətsiz və orijinal olmayan generator isə tələb olunan gərginliyi sabit şəkildə vermədiyi üçün akkumulyatoru həddindən artıq yükləyə, ya da əksinə, yetərincə doldura bilməz. Bu isə həm akkumulyatora, həm də bütün elektron sistemlərə zərər verə bilər. Starter isə mühərrikin ilk hərəkətini təmin edir və orijinal olmayan starterlərdə sargı, dişli sistemi və mexanizmlər zəif olduğuna görə mühərrik işə düşərkən çətinlik yaranır. Bəzi hallarda isə ümumiyyətlə işə düşməyə bilər. Ucuz alternativlər həm vaxtından əvvəl sıradan çıxır, həm də daha bahalı elektron hissələri zədələmə riski yaradır. Buna görə generator və starter kimi kritik hissələrdə yalnız orijinal seçim edilməlidir.

Sensorların yalnız orijinal seçilməsi

Avtomobilin elektronik idarəetmə sistemləri onlarla müxtəlif sensorun dəqiq məlumatlarına əsaslanaraq işləyir. Mühərrik temperaturu, yağ təzyiqi, hava axını, oksigen səviyyəsi, krank mili mövqeyi, ABS siqnalları və digər vacib parametrlər sensorlar vasitəsilə beyin blokuna ötürülür. Bu məlumatlarda ən kiçik səhv belə avtomobilin iş ritmini pozur, yanlış qarışıq hazırlanmasına, güc itkisinə, yüksək sərfiyyata və hətta mühərrikin özünü qoruma rejiminə keçməsinə səbəb ola bilər. Saxta sensorlar düzgün kalibrlənmir, temperatur və gərginlik dəyişikliklərinə qarşı dayanıqsız olur və tez-tez səhv oxuma verir. Bu isə sürüş zamanı təhlükəli vəziyyətlər yarada bilər. Çünki sistem real şəraiti düzgün qiymətləndirə bilmir. Orijinal sensorlar isə yüksək dəqiqliklə işləyir, avtomobilin idarəetmə beyni ilə uyumludur və uzun müddət sabit performans göstərir. Buna görə sensorlar mütləq orijinal seçilməli və avtomobilin məhz modelinə uyğunlaşdırılmış məhsullardan istifadə edilməlidir.

Orijinal ehtiyat hissəni necə tanımaq olar?

Orijinal ehtiyat hissəni tanımaq avtomobilin təhlükəsizliyi, uzunömürlülüyü və digər sistemlərin düzgün işləməsi üçün son dərəcə vacibdir. Çünki bazarda çox sayda saxta, keyfiyyətsiz və orijinala bənzədilmiş məhsullar mövcuddur. Onların bəziləri elə ustalıqla hazırlanır ki, sadə istifadəçi real və saxta məhsulu ayırd etməkdə çətinlik çəkir. Orijinal hissələr avtomobil istehsalçısının müəyyən etdiyi sərt standartlara uyğun istehsal olunduğuna görə xüsusi kodlar, holoqram, yüksək keyfiyyətli qablaşdırma və istehsalçı sertifikatları ilə təqdim edilir. Bu əlamətlərin mövcudluğu hissənin orijinallığını təsdiqləyir, əks halda məhsulun saxta olması ehtimalı yüksək olur. Hər hansı hissəni alarkən həm qablaşdırmaya, həm üzərindəki işarələrə, həm də satıcının təqdim etdiyi sənədlərə diqqətlə baxmaq orijinalı təyin etməyin əsas addımıdır.

Qutular və istehsalçı kodları

Hər bir orijinal ehtiyat hissə xüsusi qutu ilə təqdim edilir. Bu qutunun üzərində istehsalçıya məxsus loqo, məhsulun kodu, seriya nömrəsi və istehsal tarixi olur. Bu kodlar unikal olur və avtomobil markasının rəsmi bazasında yoxlanıla bilir. Saxta məhsullarda adətən kodlar ya yox olur, ya da təsadüfi şəkildə yazılır və rəsmi sistemlə uyğun gəlmir. Orijinal qutular yüksək keyfiyyətli karton və çap texnologiyası ilə istehsal edilir, fontlar dəqiq və aydın olur. Holoqram və təhlükəsizlik etiketləri isə məhsulun həqiqiliyini təsdiqləyir. Əgər qablaşdırma solğun rəngdədirsə, yazılar bulanıqdırsa, logo kənardan fərqli görünürsə və ya kodların üzəri sonradan yapışdırılıbsa, bu hissənin saxta olması ehtimalı böyükdür.

Satıcıdan tələb edilməli olan sənədlər

Orijinal ehtiyat hissə alarkən satıcıdan qaimə, zəmanət kağızı və məhsulun orijinallığını təsdiq edən sertifikat tələb olunmalıdır. Rəsmi distribyutorlar və etibarlı mağazalar bu sənədləri mütləq təqdim edir. Çünki orijinal məhsullar rəsmi qeydiyyatla satılır. Saxta məhsul satan yerlər isə çox vaxt sənəd verməkdən yayınır və ya qeyri-peşəkar şəkildə tərtib olunmuş, heç bir hüquqi qüvvəsi olmayan kağızlar təqdim edir. Sənədlərin olması yalnız məhsulun orijinal olduğunu göstərmir, həm də hissədə problem olarsa istehlakçının hüquqlarını qorumağa imkan verir. Əgər satıcı sənəd verməkdən imtina edirsə, həmin məhsulun saxta olması ehtimalı yüksəkdir. Belə alış-verişdən dərhal imtina etmək lazımdır.

Saxta hissələri tez müəyyən edən vizual əlamətlər

Saxta ehtiyat hissələri bir çox vizual detallarla orijinaldan seçilir. Kobud emal izləri, keyfiyyətsiz metal və plastik, solğun və asimmetrik rəng çalarları, keyfiyyətsiz çap olunmuş yazılar və markalanmalar ən əsas göstəricilərdir. Orijinal hissələrdə bütün səthlər hamar olur, metal hissələrdə çürük və pas izləri olmur. Plastik hissələr isə hamar və bərk materialdan hazırlanır. Saxta məhsulların qablaşdırması çox vaxt nazik, cırıq və ya kobud çaplı olur, üzərindəki loqolar qeyri-peşəkar görünür, ölçü və forma isə çox vaxt orijinalla tam uyğun gəlmir. Orijinal hissənin çəkisi belə saxta məhsuldan fərqlənə bilər. Çünki keyfiyyətsiz materiallar daha yüngül olur. Bu səbəbdən alıcı həm qablaşdırmaya, həm də hissənin özünə diqqətlə baxmalı və ən kiçik uyğunsuzluqda məhsuldan imtina etməlidir.