Avtomobil ehtiyat hissələri alarkən diqqət ediləsi məqamlar

Yeni və ya ikinci əl avtomobil alsanız da, bir müddətdən sonra köhnəlmə, şəxsi maraq və ya ən pis halda qəza səbəbi ilə bəzi orijinal hissələri dəyişdirilməli ola bilərsiniz. Bu zaman ehtiyat hissələri və ya avto aksessuarlara ehtiyacınız ola bilər.
Avtomobil üçün ehtiyat hissəsi alarkən bir neçə nüansa diqqət etmək lazımdır:
1. Maşın ehtiyat hissələri alanda orijinal olmasına diqqət etmək lazımdır. Bunun iki əsas səbəbi var. Birincisi maşınınızı daha sonra satmaq istəsəniz bu bazar qiymətinə təsir edəcək. Digər səbəb isə orijinal ehtiyat hissələrinin kasko sığortası zamanı avantajlı olmasıdır.
2. Ehtiyat hissələri aldığınız mağazanın və ya istehsalçı firmanın məhsula görə zəmanət verməsinə diqqət edin.
3. Almaq istədiyiniz ehtiyat hissəsinin avtomobilinizə uyğun olub-olmamasına fikir verin.
4. Şəxsi maraq və zövqünüzə uyğun olaraq alacağınız ehtiyat hissəsi avtomobilin performansına, təhlükəsizliyinə və rahatlığına təsir edə bilər. Ona görə də ehtiyat hissəsi alarkən avtomobilinizi də nəzərə alın.
Orijinal avtomobil ehtiyat hissələri
Avtomobillərin orijinal ehtiyat hissələrini həmin avtomobil firmasının əməkdaşlıq etdiyi alt firmalar istehsal edir. Məsələn, Hyundai model maşınların ehtiyat hissələri Hyundai markasının əməkdaşlıq etdiyi, lisenziyalı X adlı bir müəssisə tərəfindən istehsal edilir.
Orijinal ehtiyat hissələr ilə bağlı bir neçə termin var ki, bir-birilərinin əvəzinə istifadə olunsalar da, əslində fərqli mənaları var.
OEM (Original Equipment Manufacturer). OEM avtomobil markası tərəfindən lisenziyalaşdırılmış orijinal avadanlıq istehsalçısı deməkdir. Məsələn, Mercedes ehtiyat hissələri istehsal edən Lemförder şirkəti OEM adlanır. Çünki ehtiyat hissələrini istehsal edən şirkətlər arasında Mercedes tərəfindən təsdiqlənən şirkətdir.
OES (Original Equipment Supplier). OES distribüter, yəni orijinal ehtiyat hissələrinin satışını təşkil edən deməkdir. OES ilə OEM bir çox hallarda qarışdırılır. OEM lisenziyalı ehtiyat hissələri istehsal edənə, OES isə həmin ehtiyat hissələrin satışını edənə deyilir. Məsələn, qeyd etdiyimiz kimi Mercedes markalı ehtiyat hissələri istehsal edən Lemförder şirkəti OEM, Lemförder şirkətinin istehsal etdiyi məhsulların satışını edən X adlı şirkət isə OES adlanır.
OEP (Original Equivalent Part). Digər anlayış da OEP-dir ki, bu da OEM kimi ehtiyat hissələri istehsal edir. Amma bu zaman avtomobil markası həmin istehsalçı şirkətə lisenziya vermir. Yəni tam da orijinal olmayan, loru dildə "paddelka" adlandırdğımız ehtiyat hissələrini istehsal edən şirkətlərə OEP deyilir. Məsələn, Mercedes markasının ehtiyat hissələrini istehsal edən Sonax şirkətinin adını qeyd edə bilərik. Sonax da Mercedes ehtiyat hissələri istehsal edir, lakin markanın lisenziyalı istehsalçısı olan Lemförder Sonax şirkətini hər hansısa tədarükçüyə tövsiyə etmir.